Cebuano News: Dili maapektohan ang gagmay'ng mangingisda sa drilling project - DOE
By Hazel F. Gloria
Cebu, Philippines (15 Nobyembre) -- Gipasalig ni Engr. Antonio Labios, ang Regional Director sa Department of Energy (DOE), nga dili ra maapektuhan ang mga mangingisda sa Aloguinsan ug Pinamungajan, Cebu sa gipahigayon nga Ipil-Ipil exploratory drilling project sa Taņon Strait sulod sa duha ka buwan.
Ang maong proyekto gisugdan niadtong Disyembre 2004 sa DOE ug JAPEX Philippines Ltd. (usa sa nag-una nga Japanese upstream company). Gipahigayon ang usa ka proseso sa pagsurvey kung adunay bay lana ug gas sa ilawom sa kadagatan sa Taņon Strait.
Ang Presidential Proclamation 1234, midiklarar sa maong lugar nga usa ka "protected seascape." Gumikan niini, adunay gikinahanglan nga Environmental Compliance Certification (ECC) aron pagpasalig sa mga tawo nga dili kini makadaot sa marine ecosystem sa maong kadagatan.
Gipahayag usab ni Engr Labios nga duha lang kabulan ang pagkaot ug exploratory well alang sa pagsusi sa kalidad sa lana ug gas sa ilawom sa dagat.
Adunay gipanghatag nga tabang ang DOE, JAPEX ug ang lokal nga pang-gobiyerno aron sa pagsuporta sa mga mangingisda sa ilang adlaw-adlaw nga panginahanglan.
Adunay uno punto singko (1.5) kilometro ang gilay-on sa mga corals o fish sanctuary gikan sa maong lugar diin gipahigayon ang maong proyekto.
Ug sa laing bahin usab, si Lou Arciaga ang tigpamaba sa BFAR-7 mibutyag nga aduna silay gipahigayon nga "fish-catch monitoring study" sa pagsugod ug pagkahuman unya sa drilling exploration project. (PIA-Cebu) [top]
