Cebuano News: Sa nagsulbong nga peso, kagamhanan mihimo'g lakang pagsagop sa mga na-alkanse
by Rey Anthony Chiu
Manila (15 December) -- SA mga na-alkanse sa nagsulbong nga peso, si Presidente Gloria Macapagal-Arroyo ug ang iyang Kabinete nagpahimutang usab sa mga lakang aron kunhoran ang epekto niini sa local nga ekonomiya.
Matud sa Kalihim sa Kabinete nga si Ricardo Saludo, gipahimutang na sa kagamhanan usa ka pundo nga gihinganlan og Development of the Philippines (DBP) hedge fund. Kini nga pundo gamiton sa mga exporters aron may makuot ilabi na sa nag saka-naug nga bili sa rehiyonal nga panalapi.
Dugang pa, sa mga trabahante nga nawad-an og trabaho dala sa mga kompanya'ng wala makalahutay sa pagtaas sa peso, gipundohan pinaagi sa P1bilyon ang mga nataktak sa trabaho pinaagi sa mga skolarship sa Technical Education and Skills Development Authority (TESDA).
Niini, gipahiluna usab ang pagpakunhod sa bayranan sa koryente sa mga economic zones.
Gisugyot na sa Department of Justice (DOJ) ang pag-gahum sa Philippine Export Zone Authority (PEZA) nga maoy magbu-ot sa mga bayranan sa koryente sa ilang mga export zones.
Gawas niini, ang Presidente nagmandu na usab, matud ni Saludo sa binilyon ka pesos nga gas royalties, mga ganansya sa Napocor ug sa WESM charges aron itapal sa pagpakunhod sa mga bayranan sa koryente sa katawhan.
Kasamtangan usab nga giduso ni Sen. Mar Roxas ngadto sa Kongreso ang pag-amendar sa Electric Power Industry Reform Act (EPIRA) aron ipa-ubos ang mga bayranan sa koryente subay sa saad sa State of the Nation Address (SONA). Kini aron katabangan pa ang mga gagmayng negosyante, sumpay ni Saludo.
Alang sa overseas Filipino workers (OFWs), gitutokan karon sa kagamhanan ang pagpakunhod sa remittance fees ug lakip na ang paghatag sa mga OFWs og tambag diin sila magnegosyo, samtang kasamtangan usab gipundohan na sa kagamhanan ang hedge fund alang kanila. (PIA) [top]
