Ni Henry S. Lagasca

Manila (4 August) -- Namnamaen iti gobierno ti suporta iti Senado ti gakat nga impila iti Kongreso para ti pannakaitantan iti eleksion diay Autonomous Region of Muslim Mindanao (ARMM) uray no pito nga aldaw laengen ti nabatbati sakbay ti Agosto 11, iti naituding nga aldaw ti eleksion.

Kinuna ni Press Secretary Jesus Dureza a nagtalinaed iti Malacanang a "sinanama agingga ti maudi a gundaway" a mangipasdek iti agnanayon a kappia diay Mindanao a kas maysa a legacy wenno pakalaglagipan ken ni Presidente Gloria Macapagal Arroyo sakbay nga aggibus iti panagtakemna inton 2010.

Inlawlawag ni Dureza a ti kangrunaan a rason no apay a paboran iti gobierno ti pannakaitantan iti eleksion ket tapno maaddaan ti ad-adu a gundaway iti konsultasion ken plebisito iti katulagan ti kappia iti nagbaetan ti gobierno ken ni Moro Islamic Liberation Front (MILF).

Ti nasao a plebisito iti mangipakita no dagiti tattao agraman gobierno local dagiti luglugar a masingsingasing a masakupan ti nailawlawa nga ARMM ket anamonganda met laeng iti territorial agreement ti mabungay nga Bangsamoro Juridical Entity.

Nupay kasta, nakasagana ti Malacanang iti uray ania a pangeddeng ti Kongreso iti nasao a gakat agraman ti tignay nga aramiden ti Senado.

Kinuna ni deputy Presidential Spokesperson Anthony Golez a katartaripnong metten ti Malacanang dagiti nadumaduma a grupo diay Mindanao tapno mailawlawag kadakuada dagiti implikasion iti pannakaitantan ti eleksion.

Ti Kongreso ti nangipila idi Huebes ti maysa a gakat a mangitantan ti Agosto 11 nga ARMM election tapno maigiddanto daytoy iti pannakaangay ti nailian nga eleksion inton 2010.