Cebuano News: DOLE Zambo Sur magpahigayon ug duha ka adlaw nga service caravan saa Martes
Pagadian City (17 November) -- Isip paglusad sa ika-75 nga Anibersaryo sa Department of Labor and Employment (DOLE), ang Zamboanga del Sur Provincial Office magpahigayon ug duha ka adlaw nga Provincial Service Caravan ugma Nobyembre 18 ug Nobyembre 20, ning tuiga.
Matud pa ni DOLE Provincial Officer Virginia L. Bonbon, ang nasangpit nga Caravan ipahigayon sa lungsod sa Molave ning lalawigan sa Nobyembre 18 ug sa San Miguel sa Nobyembre 20.
Ang Caravan nagtanyag sa mga katawhan sa tukma nga mga impormasyon sa mga programa ug serbisyo sa nasangpit nga Departamento uban sa mga attached agencies sama sa Technical Education Skills and Development Authority (TESDA), Department of Trade and Industry (DTI), Public Employment Serive Office (PESO), Philippine Information Agency (PIA) ug uban pa .
Tipik sa mga pinakadayag nga kalihokan atol sa maong caravan mao ang pagtugyan sa mga tseke ngadto sa mga nagkalain-lain nga mga benepesyaro sa mga proyektong pangkinabuhian kini sa mga sektor sa mag-uuma, mangingisda, kababayen-an, ug uban pa, aron matabangan pagpalambo sa ilang panginabuhian uban pagtabang sa nasudnong kagamhanan pinaagi sa nasangpit nga buhatan. (PIA-Pagadian) [top]
