Waray-Waray News: Pilipinas ginpangunahan an interfaith resolution sa UN General Assembly
Ni Nene A. Manzanares
New York (17 Nobyembre) -- An United Nations General Assembly mao an nagtapos san duha ka adlaw nga miting parte san interfaith cooperation o kun pagburubligay sa luyo san pagkakaiba san tuluuhan para san kamurayaw san naglabay nga Nobyembre 13.
Gintapos ine san pagundong ngan pagkarawat san ginpangunahan san Pilipinas nga resolusyon diin nagaaghat san mga miembre nga mga nasud nga maghimo sin mga pitad nga ig-undong an paghisinabtanay pinaagi sin uruistorya o dayalogo san mga grupo nga may pagkakaiba sa tuluuhan ngan kultura agud magkayaun pagsipasensyahay ngan pagkasarabot.
Sa pagreport san Philippine Mission (para san United Nations) kan Foreign Affairs Secretary Alberto G. Romulo mahibaruan nga an resolusyon nga ginhimo san Pilipinas ngan Pakistan nga "Promotion of Inter-religious and Intercultural Dialogue, Understanding and Cooperation for Peace" mao in ginkarawat ngan ginudnong san general Assembly san pankatapusan nga plenary meeting san mga dumagko sa United nations san naglabay nga Huebes nga adlaw.
An nasabi nga resolusyon in personal nga ginpakila ni Presidente Gloria Macapagal Arroyo dida san pag-abre san naglabay nga Mierkoles san plenary meeting sa Agenda Item 45: A Culture of Peace diin ginpartisirparan ine san mga kinikila nga mga lideres san kalibutan ngan sira King Abdullah san Saudi Arabia, King Abdullah san Jordan, United States President George Bush, British Prime Minister Gordon Brown ngan israeli President Shimon Peres.
Si Ambassador Hilario G. Davide Jr., nga mao an Philippine Permanent Representative sa United Nations, nagsugad nga nakadugang sa Pilipinas ngan Pakistan an 76 pa nga mga nasud kaupod an China, Japan ngan russia nga mao an nag co-sponsor san resolusyon. Mas nagdamo ine tikang sa 56 nga mga Member-States nga nag co-sponsor san resolusyon san naglabay nga tuig ngan san 24 nga nag co-sponsor san orihinal nga resolusyon san tuig 2004.
Sugad ni Davide nga bisan pa man ika lima na ine nga resolusyon nga ginpangunahan san Pilipinas ngan ginundong san ngatanan nga miembro tikang san tuig 2004, an 2008 nga resolusyon in importante kaupay matungod nga pormal nga ginkila san siyahan nga higayon an upat nga mga dagku nga mga inisyatibo parte san interfaith san Pilipinas, ngan ine nga mga inisyatibo in gawas san mga buruhaton san United Nations.
An nasabi nga mga inisyatibo mao an Ministerial Meeting on Interfaith Dialogue and Cooperation for Peace ngan san Tripartite Forum on Interfaith Dialogue and Cooperation for Peace sa pankalibutan nga lebel ngan san Asia-Europe Interfaith Dialogue Forum ngan san Asia-Pacific Interfaith Dialogue for Peace and Harmony sa rehiyon nga lebel.
An resolusyon in nagtanom sin liso nga naghimo pagdeklarar san United Nations Decade on Interfaith Dialogue and Cooperation for Peace from 2011 to 2020. Sine nga resolusyon ginaaghat gihapon an mga miembro nga mga nasud nga igkonsiderar an ideya nga mas hiluag nga proseso pandayalogo san pankalibutan nga mga relihiyon.
Si Ambassador Leslie Gatan san Philippine Deputy Permanent Representative nga an mga bag-o nga mga nagsuporta san resolusyon in resulta san hingpit nga negosasyon san mga diplomat san Philippine Mission.
Sugad pa ni Ambassador Gatan nga sa una, an Philippine interfaith initiative in gin sponsoran la san mga developing countries. Pero pagkatapos sin lima ka tuig, an mga nasud pareho san china, Japan nga Russia mao in bumulig na san grupo nga mga nagsuporta. (PIA-Northern Samar) [top]
