Ni Imelda Castro-Rivero

San Fernando City, La Union (22 December) -- Awan ti lugar ti korupsion iti lugar nga adda panagiinnayat. Ti panagayat ket mangrugi iti pagtaengan. Daytoy ket gapu ta agiinnayat dagiti kameng iti pamilia, ket dagiti pamilia ti mangbukel ti maysa a lugar. No kastoy nga adda panaginnayat, awan ti mangdangran iti padana a tao iti sao, aramid, panunot wenno pannakaliway. Ta iti tengnga dagitoy a pamilia wenno lugar ket adda iti panagayat ti Dios a kabilegan a mangpaksiat iti amin a kinadakes. Ta uray man no adda tiempo ti panagbasol, insigida nga agbabawi dagiti nakabasol ket sumukat iti pusoda ti napudno a panagayat a nagtaud iti Dios. Isu a daytoy problema ti korupsion iti pagillian ket masolbar babaen laeng iti panagiinnayat, panagsisinnakittayo a makipagili.

Iti naaramid a pannakailunsad ti 1st National Summit on United Nations Convention Against Corruption (UNCAC) a naitiempo iti International Anti-Corruption Day, aw-awagan ni Ombudsman Merceditas Guitierres dagiti amin nga umili ta inda agtitinnulong a mangkontra ti korupsion tapno masalbartayo iti kinapanglaw. Kunana a kada makipagili ket aramidenna kuma ti pagrebbenganna a mangkontra ti korupsion saan laeng a kadagiti opisina iti gobierno no di pay ket iti mismo a pribado a biagna.

Babaen met laeng iti panangted iti Opisina iti Ombudsman kadagiti dokumento ken ebidensia a mangpaneknek iti nakita a naaramid a panagkunniber. Mabalin a saan nga ibaga iti nagan dagiti nangipila ti reklamo tapno maliklikan ti panagibales dagiti naireklamo a nagkunniber iti gobierno.

Ikkan ti UNCAC ti tiempo dagiti adda iti gobierno ken civil a sosiodad ti panagkammayet a mangaramid kadagiti wagas a mangpatay ti korupsion iti pagillian babaen kadagiti maaramid a serye ti Focus Group Discussions. Ti resulta dagitoy a panagdidinniskutir ket adalento met ti tallo a sanga ti gobierno, ti civil society ken pribado a sektor sakbay a maipatungpal dagitoy a wagas.