Compostela Valley Province (22 January) -- Tungod sa automation, sulod lamang sa 36 oras human sa botohay aduna na kitay bag-ong Presidente ug Bise Presidente sa nasud. Kini tungod kay mahimo nang iproklama sa Commission on Elections (COMELEC) ang mga national winners lakip ang mga nagmadaugong senador ug party list paglabay sa 36 oras human ang alas-sais sa gabii sa Mayo 10, 2010 election.

Si Regional Election Director Atty. Remlane M. Tambuang sa COMELEC Regional Office XI nagbutyag, atol sa gihimong orientation sa umaabot nga automation poll nga gisugdan diha sa kapitolyo niadtong Lunes, Enero 18, 2010.

Ang maong orientation gitambungan sa tanang mga Provincial Officials nga gipanguluhan nila ni Gov. Arturo "Chiongkee" Uy ug Vice Gov. Ramil Gentugaya, ug sa halos tanang mga municipal officials nga gipanguluhan usab sa ilang mga Mayor ug Bise Mayor.

Tungod sa automation sa Mayo 10, 2010 nga piniliay, matud ni Tambuang nga duha ka oras human ang alas-6 sa gabii manghugyaw na sa kalipay ang mga nakadaug. Kini tungod kay mahimo nang iproklamar sa Comelec ang mga mananaug sa lungsod nga naglangkob sa mga mayor, bise mayor ug mga konsehales sa alas-otso sa gabii.

Sa alas-11 sa gabii kon lima ka oras human ang alas-6 sa Mayo 10 nga piniliay, mahimo na usab nga iproklama sa Comelec ang mga Provincial Winners nga naglangkob sa gobernador, bise-gobernador, SP members ug mga Congressional Winners.

Ang 2010 Automated Election karong Mayo 10 magsugod sa alas siyete sa buntag ug mahuman sa alas sais sa gabii. Human niini mao ang pag-transmit sa resulta gikan sa presinto paingon sa Municipal Board of Canvasser sa lungsod, sa Provincial Board of Canvasser sa lalawigan, ug sa National Board of Canvasser sa Comelec Central Office sa kauluhan.

Gikan sa alas-siyete sa buntag hangtud sa alas-6 sa gabii, ang himoon sa mga botante mao ang pagboto, ug ihapon dayon ang ilang boto pinaagi sa paghungit sa balota ngadto sa PCOS (Precinct Count Optical Scan) machine diha sa mga clustered precincts.

Human sa botohay ug ang inihapay. Magsunod niini ang pag-transmit sa resulta ngadto sa Municipal Board of Canvasser, ug sa City Board of Canvasser. Isunod usab dayon ang pag-imprenta ug kopya sa resulta nga ihatag ngadto sa mga Dominant Majority Party, Dominant Minority Party, sa Municipal Board of Canvasser, sa City Board of Canvasser, sa Kongreso, ug sa Comelec Central Office sa kauluhan.