Waray-Waray News: PGMA tatambungan an anibersaryo han DBP
Manila (25 January) -- Tatambungan yana nga adlaw, Lunes, ni President Gloria Macapagal-Arroyo an pagsalin-urog han ika 63rd nga anibersaryo han Development Bank of the Philippines, ha syodad han Makati.
Sumala han report, ipapakita daw kan Pres. Arroyo in usa nga katangduan han DBP ha Overseas Workers Welfare Administration (OWWA), nga may panuyo mabuligan an mga Pinoy OFWs lakip na an ira mga pamilya.
Labot hine, pag-aabrehan daw, pinaagi hin seremonyas an modelo han bag-o nga DBG Green building nga ipapatindog ha Bonifacio, syodad han Taguig.
Gin ngaranan daw nga green an DBP green building tungod kay plano daw dinhe nga gamiton an solar power o kuryente nga tikang han adlaw ug an atop in nakakaiban daw mismo han paso.
Ipapagamit daw kan Pres. Arroyo dida han seremonyas han paglubong han corner stone han bag-o nga building, an gold trowel nga gin gamit pa daw hadto may kwarenta anyos na an nakakalipas han una nga paghimoon an DBP ha Makati. (PIA-Eastern Samar) [top]
