Cebuano News: Geriatric Health Center kabahin sa mga ibilini ni PGMA
By Lanie Pitao-Tupaz
Manila (24 May) -- Ang pinakaunang National Center for Geriatric Health kon NCGH nga kabahin sa ibilin ni Presidente Gloria Macapagal-Arroyo sa mga lumulupyong Pilipino nagsugod na paghatag ug espesyal nga serbisyo alang sa mga tigulang nga kadaghanan mga kabus, sumala pa ni Deputy Presidential Spokesperson Charito Planas.
Gibuksan ang Dr. Eva Macaraeg-Macapagal National Center for Geriatric Health nga kanhi Singian Hospital nga anaa mahimutang sa General Solano Street sa Malacaņang, Manila, nga gilaomang makahatag ug espesyal nga pagtagad sa mga katigulangan nga mirepresentar sa 6% ngadto sa 7% sa kinatibuk-ang populasyon sa Pilipinas ug magduso sa medical tourism sa nasud.
Si NCGH chief Dr. Miguel Ramos Jr., kinsa mao usab ang presidente sa Philippine Society of Geriatric Medicine, mibutyag nga ang center gidumala na karon ug grupo sa mga doctors, nurses, therapists, caregivers ug uban pang mga empleyado nga hanas sa pag-atiman sa mga tigulang.
Sa pagka karon mihatag sila ug serbisyo ngadto sa outpatient, day-care ug wellness services. Sa umaabot nga panahon, ang center mohatag na ug serbisyo alang sa rehabilitasyon ug in-patient program nga adunay 50 ka higdaan alang sa pasyente.
Si Ramos midugang nga nagplano sila pagbutang ug eskuwelahan sa center alang sa post-graduate training sa mga health care providers sa mga tigulang.
Aron mahatagan pa sa mga maayong serbisyo ang mga tigulang, gilagdaan ni President ang Republic Act No. 9994 niadtong miaging buwan sa Pebrero nga nagpauswag sa mga benepisyo ug pribilihiyo sa mga senior citizens nga naghatag ug 20% nga diskuwento sa mga paraliton ug pagtanggal sa 12% nga VAT diha sa ilang mga pinalit. (PIA Biliran) [top]
