Davao City (13 July) -- Dungan sa gihimong pagpanghatag ni Gov. Arturo "Chiongkee" Uy sa 6,466 ka armchairs sa mga Public Secondary Schools, mao ang iyang gihimong pagpanghatag usab sa mokabat 5,517 ka mga plastic chairs sa mga pampublikong tulunghaan sa elementarya ug sekondarya diha sa Compostela Valley.

Kini base usab sa gipagulang report ni Mr. Romeo Miranda sa Provincial General Services Office (PGSO), atol sa gihimong pakighinabi diha sa iyang buhatan sa kapitolyo niadtong nakalabayng semana.

Base sa gipagulang report nga dungan sa 1,466 ka mga armchairs nga iyang gipanghatag sa mga pampublikong tulunghaan sa Sekondarya niadtong tuig 2007, mao ang gihimo niyang pagpanghatag usab ug 2,000 dayon ka mga plasic chairs sa mga tulunghaan sa elementarya ug sekondarya.

Niadtong tuig 2008 nanghatag usab siya ug 2,000 ka mga plastic chairs sa mga tulunghaan sa sekondarya ug elementarya dungan sa gihimo niyang pagpanghatag sa mokabat 1,530 ka mga arm chairs sa mga pampublikong tulunghaan sa sekondarya.

Dugang 3,517 usab ka mga plastic chairs ang iyang gipanghatag sa mga pampublikong tulunghaan sa elementarya ug sekondarya niadtong nakalabayng tuig 2009, dungan sa gihimo niyang pagpanghatag sa mokabat 1,580 ka mga armchairs sa mga pampublikong tulunghaan sa sekondarya sa Comval.

Matud sa Gobernador nga ang mga plastic chairs maoy gamiton sa mga ginikanan, mga magtutudlo, ug mga bisita panahon nga dunay meeting ug uban pang mga kalihokan sa mga eskuwalahan.