Cebuano News: Palasyo malaomon masugdan ang peace talks niini nga tuig
By Lanie Pitao-Tupaz
Manila (19 July) -- Naghimo na ug mga lakang ang Malacaņang aron mapadali ug masugdan niini nga tuig ang pagbalik sa peace talks uban sa Muslim ug komunistang rebelde, sumala pa ni Presidential Adviser on the Peace Process Secretary Teresita Deles.
Si Deles mingon nga ang peace panel sa gobyerno kasamtangang mipahigayon ug mga lakang alinsunod sa gustong pamaagi ni President Benigno C. Aquino III pagkab-ot sa malinawon ug patas nga pagsulbad sa armadong panag-away.
Si Presidente Aquino miingon atol sa iyang inaugural speech niadtong miaging Hunyo 30 nga sinsero ang iyang administrasyon pagtratar sa mga lumulupyo sa Mindanao. Ug siya mipasalig sa malinawon ug patas nga pagsolbad sa panagbingkil alang sa kaayohan sa mga Lumad, Bangsamoro ug Kristiyano.
Si Presidente Aquino milaom nga seryoso ang mahibalik nga negosasyon aron masabtan ang ugat sa banagbingkil ug masabtan kung unsa ang kayang buhaton sa tanan partido aron masolbad ang problema.
Ang lima ka miyembro nga peace panel sa gobyerno pangunahan ni Dean Marvic M.V.F. Leonen sa UP College of Law diin pillion ug maayo ang uban pang mga miyembro niini lakip na ang mga posibleng consultants ug third party facilitators nga maglangkob sa usa ka malig-on ug aktibong grupo sa negosyador.
Ang mga pangalan sa official peace negotiators anha pa ipagawas kung opisyal na nga maporma ang grupo. Gusto sa administrasyon nga balanse ang representasyon sa grupo kinsa pulos may salabotan sa mga isyu nga ilang atubangon, matod pa ni Deles.
Samtang midumili ang Palasyo paghatag ug time frame aron makompleto ang mga preparasyon apan gisugdan na ang mga unofficial communications diin gusto sa administrasyon nga "fully on board" si Leonen usa pa molingkod ang peace panel alang sa ilang unang panagtigom. (PIA Biliran) [top]
