Manila (19 July) -- Ginbuhian han mga membro han New People's Army (NPA) han nakalabay nga Biyernes in usa nga Job Castro, dise-7 anyos an panuigon nga ira anay ginbihag ug ginpatrabaho ha ira kagiusan.

Hi Castro in ginbuhian han may alas-2 an kulop ha barangay Ngan, Compostela Valley, ha atubangan han mga local nga opisyales, ug iba pa nga mga representantes han sosyedad upod na an singbahan.

Igin sering ni Castro ha mga taga-media, nga hiya in gin rekrut hin usa nga ahente han military agud himoon nga membro han Citizen Armed Forces Geographical Unit (Cafgu) hadto han tuig 2008, han kinse anyos pala an iya edad. An iya birth certificate in man gud, nagpapamatood nga hi Castro in natawo niyan Nobyembre 7, 1992.

Gusto daw la hadto niya makabulig han iya pamilya kay ginsaaran daw hiya hin suhol nga P2,500. Kasering daw hadto niya, dako na an kantidad nga P2,500 para makabulig. Ug waray daw hiya sasabot nga supak adto ha balaud.

Nadakop ine hi Castro han mga NPA upod in usa nga Staff Sgt. Bienvenido Arguelle nga ngada yana in gibabariga pa han mga NPA.