Hiligaynon News: Pagpaninlo ginmando sang opisyal sang pulis sa Capiz
by Jemin B. Guillermo
Roxas City (29 July) -- Ginmando sa karon ni Police Provincial Direcrtor Josephus Angan sa mga kapulisan sang probinsya sang Capiz ang pagpanguna sa pagpaninlo sa kabug-usan nila nga mga talatapan.
Suno sa kay Angan nga ang pagpaninlo umpisa sa mga estasyonan sang pulis tubtob sa ila tagsa ka mga panimalay ang dako nga tikang agod matapna ang paglapta sang mga lamok nga nagadala sang madata nga sakit nga dengue diri sa probinsya.
Ginmando man niya ang tayuyon nga pag-implementar sang programa nga Clean and Green ukon pagpananom kag paninlo agod mapasiguro nga wala sang maistaran ang mga lamok nga nagahalit sa mga pumuluyo.
Bilang kabahin man sa pagsabat sang mga kapulisan diri sa padayon nga pagdamo sang mga pasyente sang dengue, ginpangunahan ni Angan ang pagdonar sang dugo pinaagi sa Philippine Red Cross, Capiz Chapter.
Suno sa kay Angan nga pinaagi sa dugo nga gindonar sang mga katapo sang kapulisan diri, ginalauman nila nga makasabat ini sa kinahanglanon nga dugo sang mga pasyente para maluwas sa kamatayon. (PIA) [top]
