Cebuano News: GMA suporta sa natural nga pagplano sa banay
by Rey Anthony Chiu
Manila (29 July) -- AGI ug pagpasihag sa iyang baruganan sa kontrobersyal nga reproductive health bill, gibutyag ni Presidente Gloria Macapagal Arroyo nga abin siya sa natural nga pagplano sa pamilya.
Sa pahayag ni Presidente Arroyo gibutyag sa iyang ika-walo nga State of the Nation Address (SONA), ang Administrasyon misubay sa natural nga paagi sa pagrenda sa nagsulbong nga populasyon sa nasud.
"Sa pagduso sa natural planning ug female education, ato na nga gipakubos ang tubo sa populasyon gikan sa 2.38% ngadto sa 2.04, butyag niya atubangan sa ika 14 nga Kongreso.
Matud niya, "ang maka-sayuranon nga pagpili nagpasabut nga mas daghang pamilya sa nasud, kinsa kasagaran mga Katoliko, masayud kabahin sa family planning.
Apan bisan pa sa kalambuan, dinhi sa Bohol, si Obispo Leonardo Medroso namahayag nga duda gihapon siya sa nag-ong-ng nga balaodnon, hinungdan nga gipasiugdahan sa simbahan ang usa ka prayer rally.
Matud niya, hanap ang balaod sa depenisyon sa reproductive health bill ug nahadlok siya nga adto isingit ang pro-abortion provisions sa implementing rules and regulations sa balaod.
Magsugod sa upat ka jump-off points ang rally karong hapon nga adto magtagbo sa Katedral ni San Jose diin mapunting ang tanang hiniusang kalihukan batok sa balaodnon.
Subay sa pagtuon, 3 ka bata ang matawo sa nasud sa matag minuto ug sulti sa mga eksperto ga kinahanglan na nga magpreno na sa tubo sa populasyon kon buot na sa nasud nga makalingkawas sa kalisud. (PIA) [top]
