Ni Ben Pacris

SAN Ildefonso, Ilocos Sur (1 October) -- Iti laksid a 200 a tawenen ti napalabas idi napasamak ti nadara a Basi Revolt iti Barangay Gongogong iti daytoy nga ili, ngem uming-ingel pay laeng ti nainhistoriaan a basi ditoy a maibilangton nga official drink iti Ilocos Sur.

Kinuna ni Gobernador Deogracias Victor Savellano a nasken a maital-o ken mapadur-as ti bukodtayo a partuat a basi nga adda pakainaiganna ti kultura ken historia dagiti Ilokano.

Daytoy ti waragawag ti gobernador a nangidonar pay iti P50,000 para iti daytoy nga industria bayat iti kaunaan a pannakarambak ti basi Revolt iti daytoy nga ili idi Setiembre 16.

Kinuna ni Gob. DV a maibilangto payen ti Setiembrte 16 a kas official Public Holiday iti San Ildefopnso tapno tinawen a marambakan daytoy nainhistoriaan nga iyaalsa dagiti Ilokano kontra iti naiyetnag idi a Basi Monopoly babaen iti turay Kastila.

"Kadagiti okasion nga angayen ti provincial government maiparaman ti basi kadagiti sangsangaili ken turista tapno mai- promote daytoy a produkto," kinuna ti gobernador.

Impanamnama met ni Diputado Ronald Singson a suportaranna ti pannakapadur-as ti industria ti basi aglalo ta daytoy ti mangipalagip ti Basi Revolt idi 1807 a napateg iti historia dagiti Ilokano.

Kinuna met ni Mayor Christian Purisima a ti basi ti napili ti San Ildefonso para iti "One Town, One Product" program ni Presidente Gloria Macapagal Arroyo. Ti Barangay Gongogong ti pakaart-aramidan dagiti naimas a basi manipud pay idi tiempo ti Kastila.

Mailako ti sangabotelia a basi nga addaan iti marka a Gongogong 1807 Revolt kadagiti igid ti kalsada iti ili pakairamananto kadagiti groseria iti Vigan ken Candon ken urayto pay iti Metro Manila, knuna ti mayor.

"Tay black label, nasugpet a basi wenno naing-ingel ngem tay red wine, nasamsam-it," kinuna ti mayor numan pay innayonna a maital-o pay ti Sukang Iluko a produkto met laeng ti ili.

Maipalagip a napasamak ti Basi Revolt idi Setiembre 16- 28, 1807 a nangrugi iti Piddig. Ilocos Norte ken naggibus iti Gongogong, San Ildefonso, Ilocos Sur nga ayan idi ti Karayan Bantaoay a nakapasamakan ti nadara a ranget dagiti insurekto nga Indio kontra kadagiti soldado ti turay Kastila.