Ilocano News: 6 a baro nga opisyales naituding nga agakem iti maduma-duma nga posisyon iti gobyerno
Ni Miriam P. Aquino
San Fernando City, La Union (1 October) -- Inwaragawag ni Executive Secretary Eduardo Ermita dagiti 6 nga opisyales nga inapointaran ti Presidente nga agakem kadagiti maduma-duma nga posisyon iti gobyerno.
Kinuna ni Ermita sadiay media briefing na idiay Malacaņang nga insigida a maimplementar daytoy nga appointment ket innaganan na dagitoy nga kabarbaro nga opisyales.
Agakem a kas baro nga Undersecretary iti Department of Justice (DOJ) ni Linda Hornilla, dati a police commissioner ken senior state prosecutor. Sinukatan ni Hornilla ni dati nga Undersecretary Macabangkit Lanto, nagkandidato para Congressman ti probinsiya a Lanao del Sur idi napalabas nga eleksiyon ti Mayo 2007.
Iti dadduma pay nga naapointaran ket isuda DOJ Asst. Secretary Arthel Caronongan, dati nga Associate Commissioner iti Bureau of Immigration (BoI) iti sidong ti DOJ; Commissioner Nieves de Castro a mangirepresentar ti sector dagiti empleyado wenno mangmangged iti sidong ti National Labor Relations Commission (NLRC) iti Department of Labor and Employment (DOLE); ni Assistant Secretary Eduardo C. Nolasco iti Department of Agrarian Reform (DAR), Assistant Secretary Eubert P. Gutierrez iti Department of Interior and Local Government (DILG) ken ni Assistant Secretary Parisya Hasmin Taradji iti sidong ti Department of Social Welfare and Development (DSWD). (PIA La Union) [top]
