MADRID (7 December) -- Si Press Secretary ug Presidential Spokesperson Ignacio Bunye misalikway sa mga pagsaway labot sa pag-adto ni Pangulong Gloria Macapagal-Arroyo didto Uropa, diin iyang gitumbok nga ang unom ka adlaw opisyal nga panaw sa Presidente sa nasud sa Espana ug London wala ma-alkansi sa gasto niini.

Giluwatan ni Bunye ang maong pamahayag isip iyang reaksyon sa mga pagbuyag bahin sa gasto sa Presidential party nga naglakip og pipila ka mga magbabalaud ug uban pang mga opisyales.

Siya nagkanayon nga gawas sa Presidente ug ang iyang bana, si First Gentleman Jose Miguel Arroyo, ang nanguban sa biyahe naglakip sa upat ka mga Cabinet members, tulo ka Senador, duha ka Pangulo sa House of Representatives, ug ang Philippine Ambassador sa Spain.

Ang uban pang mga Congresista nga nanguyog pulos nagbayad sa mga galastuhan gikan sa ilang mga kaugalingong panudlanan, dugang pa ni Bunye.

Gitataw ni Bunye nga ang nag-una gyod nga katuyoan sa bisan unsang presidential trip adto sa gawas sa nasud mao ang pag-lig-on sa maayong relasyon ug panagdait sa Pilipinas tali sa ubang kanasuran alang sa ilang patas nga panginahanglan.

"Mas duol ang relasyon nato sa ubang nasud makapausbaw dili lamang sa atong foreign policy kondi hasta usab ang kabahin sa economic security," si Bunye miingon.

Matud ni Bunye nga ang State Visit sa Pangulo didto sa Espana mi-resulta sa pag-pinirmahay sa mga kasabutan nga mobili og P 9 billion alang sa mga proyekto sa agrikultura nga sa kapulihay mapahimuslan sa mga Pilipino.

Giklaro sab niya nga dili unta kini matigayon kining maong mga kasabutan kon ang Presidente wala pa personal manginlabot sa mga talandogon nga bahin sa negosasyon.

Nag-unang mabantayan niining daghang kasabutan mao ang dinaghan nga pagpananom og tuba-tuba isip sugnod sa mga sakyanan o kaha sangkap nga pagkaon sa mga kahayopan.

Ang Ministry of Agriculture sa Espanan ug ang Department of Agriculture sa Pilipinas nagpirmahay og Memorandum of Agreement (MOA) labot sa pagpalambo sa usa ka gatos ka ektarya nga kayutaan sa Palawan alang sa jatropha production.

Ubos sa naasoy nga MOA, mopuhonan ang Espana bali og $ 200 Million alang sa naasoy nga proyekto, lakip na ang pagtukod og planta sa extraction ug distillery sa ma-ani unya nga mga tuba-tuba, ug kini gilantaw nga maoy kinadak-an nga matukod dinhi sa nasud.