Manila (15 February) -- Taliwala sa mga bag-ong hulga sa de-estabilisasyon sa kagamahanan, ang Liga sa mga Lalawigan/ Gubernador sa Pilipinas (LPP) mipadayag sa ilang kinatibuk-ang pagsuporta kang Presidente Gloria Macapagal-Arroyo.

Sa usa ka "Manifesto of Support", ang mga hepe ehekutibo sa lalawigan mipadayag usab sa ilang wala pag-ayon sa unsa mang pama-agi nga wala mahisubay sa konstitusyon ug ang awhag sa pag-undang sa mga away politikanhon, kini alang sa kaayuhan sa nasud.

Ang "manifesto" gilagda-an sa mga 80 ka gubernador human sa ilang ikaduhang tigum sa Liga didto sa Camarines Sur.

Matud pa sa Presidente sa LPP President ug Gubernador sa Misamis Occidental nga si Loreto Leo Ocampos, ang gilagda-ang "manifesto" tima-ilhan sa ilang walay pu-as nga suporta sa administrasyon ni Arroyo.

Sa iyang pagpasalamat sa suporta nga gihatag sa mga gubernador, gi-awhag usab ni Presidente Arroyo nga angay magtinabangay ang nasyonal ug lokal nga pamunuan aron makab-ot ang tinu-uray sa asenso sa ekonimya, labina sa paghatag ug maayong kalidad sa kinabuhi sa mga kabus sa kanasuran.