Ilocano News: "World-class" nga hotel mapatakder, makatulong irarang-ay Pilipinas
Ni Jessie R. Valdez
San Fernando City, La Union (3 July) -- Nanipud pay idi simmangpet ni Presidente ditoy pagilyan manipud Amerika, naobserbar ti kaadduan a kasta unay ti panagwerret na nga agtrabaho bilang Presidente ta di pay kanu nakainana nga husto ket dagusen a napan mismo kadagiti lug-lugar nga nakalamidad ket inna imparikna ti panangipateg na kadakuada.
Indauluan na ti nagibunong kadagiti tulong wenno arayat kadagiti tattao ket pinadaras na amin kadagiti ahensias ti pannakataming ken pannaka-trabaho dagiti naperperdi nga rang-rangtay, kalsada, eskuelaan ken amin nga banag a pakaseknan agrikultura ken sidsida.
Iti inna panagarayat kadagiti nadidigra, agtultuloy met latta ti pannaka-aramid wenno pannaka-akomplisar dagiti programa na a mamagtuloy mangpaatibker ikonomia kas panagipastrekan ken panagipundar negosyo, panagrang-ay turismo, adu a malukatan pagtrabahuan ken dadduma pay.
Malaksid kadagiti inatendaran na nga anibersaryo itay July 1, inaguraran na ti dakkel ken moderno a provincial hospital, agbalor P6-M sadiay Davao del Sur ket simmaruno ti papan na pinang- "ground break" ti pannaka- ipatakder ti "world-class" a hotel sadiay dati a headquarters ti Philippine Army-Fort Bonifacio.
Ni PGMA ti nang "ground-break ti nasao nga Shangri-La Hotel at Fort, Manila ditoy Taguig City a maipatakder iti agarup agbalor dua gasut ket limapulo a milyon nga dolyar ($250-M).
Ti nasao nga kabaruanan a hotel a maiparis kadagiti kamodernuan ken kapintasan a hotel ditoy lubong ket mabangon nga ad-daan innem a pulo a katukad, lima gasut a kuar-kuarto para kadagiti nangangato nga bisbisita manipud ballasiw-taaw ken ditoy kabangibang a lugar Pilipinas ken dua gasut tallopulo ket uppat nga apartments.
Maaramid daytoy iti naidum-duma a disenyo ket maekspektar a kaykayatan ken pagsiddaawan dagiti tattao nga umay agnaed ken mangpadas nga agyan manipud lokal ken internasyonal a kumkumpanya a mayat pay nga agipundar ken mangipalawa ti negosyo da ditoy pagilyan.
Ti pannakaipatakder ti nasao nga hotel ket mangipakita ti komitment mi ditoy Pilipinas, kinuna ni Eduard Kuok nga Presidente ken Chief executive officer ti Shangri-La Asia Limited.
Daytoy kabaruanan nga hotel ket manamnama a dakkel a tulong mangparang-ay ikonomia ti Pilipinas kas maiyalubog kadagiti programa ni PGMA. Adu ti kadua na nga hotel daytoy ket kunaen nga kakomplimentar na ti siguden a uppat nga hotel a kukua met laeng ti Shangri-La Asia Limited ditoy Pilipinas ken ti Shanri-La Resort, Spa, Boracay a naka-iskedyul met a malukatan iti daytoy a tawen. (PIA La Union) [top]
