Zamboanga City (15 October) -- "Gipalig-on sa among buhatan – ang National Meat Inspection Service (NMIS) pagsusi sa mga karne aron luwas nga pagakan-on sa mga konsumante," pahayag ni Regional Technical Director Arturo S. De Jesus, Jr. ning bag-o pa lang sa breakfast forum uban sa mga tigbalita atol pagsaulog sa ika-36 ka tuig nga anibersaryo sa NMIS ug pagsaulog sa Meat Safety Consciousness Week nga gisaulog Oktubre 13-17 matag-tuig nga nagdala sa tema nga "Ligtas na Karne sa Pamilihan, Bahagi Natin sa Kaunlaran".

"Tungod sa kalisang nga nahitabo ning bag-o pa lang nga gidulot sa melamine nga nasagol sa mga gatas nga gikan sa Tsina, gipaneguro sa kagamhanan nga luwas dinhi sa atong nasud ang mga karne nga atong gikaon matag-adlaw pinaagi pagpalig-on pagsusi sa mga gipang-ihaw nga karne sa slaughterhouse matag-adlaw," matud pa ni De Jesus.

Dugang pa niya nga aron pagseguro nga luwas sa mga sakit ang karne, "ang NMIS naghimo ug sampling sa mga gipang-ihaw nga karne aron pagtino wala gitakboyan sa sakit ug wala nabutangan sa mga ginadili nga tambal."

Base sa mga pagtuon sa nasangpit nga buhatan, nasayran nga dili kalikayan nga sa pagpasanay sa mga kahayupan ilabi na ang baboy, paimnon ug tambal sa nag-alima niini aron bug-at ug paspas ang pagtubo, ug ang mga tambal nga gidapat sa lawas sa kahayupan nagdulot sa kanser sa atay.

Dugtong pa ni De Jesus nga gisusi nila pag-ayo nga ang mga karne nga pang-ihawon nga dili masagulan sa ginadili nga mga tambal nga makahilo sa tawo.

Gipaneguro ni De Jesus nga ang mga karne nga gipang-ihaw ug gibaligya sa merkado, lakip na ang mga gipangsuroy nga mga lechon luwas sa mga sakit tungod kay kini ang miagi sa slaugtherhouse ug gisusi sa mga meat inspectors.