Waray-Waray News: RP prayoridad han Korea para tagan hin tambulig - NEDA
Manila (5 March) -- Igin report han National Economic and Development Authority (NEDA) nga prayoridad nga padad-an hin tambulig han goberno han Korea an Pilipinas o an Official Development Assistance (ODA).
Sumala kan NEDA Deputy Director General Rolando G. Tungpalan, nagpahayag na daw hi Yoon Tae-Yong han South Korea Ministry of Strategy and Finance, nga interesado an ira goberno nga dugngan an ira tambulig ha Pilipinas para hiton yana nga tuig tubtob 2013, pinaagi han kanan Korea Economic Development Cooperation Fund o EDCF.
Waray daw kantidad nga iginsabi han opisyal nga taga Korea, kundi magdi unanao pa man, dako daw ine nga kalipayan para han nasud Pilipinas.
Ine daw nga EDCF nga natukod niyan pa han 1987, in kanan Korea espesyal nga pondo para ipautang ha mga nasud nga magkurihay.
Ha pagkayana, an EDCF Framework Agreement ha butnga han Korea ug Pilipinas nga nagtikang pa han 2007 tubtob 2009 in naabot hin US $300 million. (PIA-Eastern Samar) [top]
