Waray-Waray News: PGMA makadto sa Vietnam pag-atendir san World Economic Forum sa Hunyo 6-7
ni Ailene N. Diaz
Manila (18 May) -- Ginkarawat ni Presidente Gloria Macapagal-Arroyo an imbitasyon sa kanya pag-atendir san ika 19 nga World Economic Forum on East Asia nga paghihimuon sa Vietnam sa Hunyo 6-7.
Sa radio interview, nagsugad si Presidential Spokesman Ricardo Saludo nga an World Economic Forum on East Asia 2010 nga nakatalaan nga himuon sa Ho Chi Minh in importante kay ini maghahatag sa Pilipinas sin tsansa nga maipasabot ngadto san mga business leaders sa bug-os nga kalibutan san kamanilampuson san ginkundukto nga piniliay nga kon diin ginlalauman nga dugang makaghatag sin pagtapod san iba nga nasud nga mamuhunan dihan sa Pilipinas.
An Vietnam an napili nga mananalagtawo san WEF on East Asia 2010 tungod san ini liwat an nalingkod nga namumuno san Association of Southeast Asian Nations (ASEAN) nga sayo liwat nga nagtutubo nga nasud sa rehiyon.
Maabot 400 nga mga political ngan business leaders ngan mga eksperto an magtitirirok sa Vietnam sa sunod nga bulan para san ika 19 nga World Economic Forum on East Asia, ini an nakuha sa WEF official website.
Ini nga kinatuig nga panhitabo nga yaun tema nga "Rethinking Asia's Leadership Agenda" in matutok san upat nga topiko nga mao an masunod: Asia 's leadership agenda, global risks, green economics ngan programs for future growth.
An World Economic Forum in Geneva-based non-profit nga foundation nga kilala san ginhihimo sini nga kinatuig nga katirirok sa Switzerland nga diin nagtuturupo an business executives, mga lederes, intellectuals ngan journalists para magdiskurso san pinaka importyante nga isyu pankalibutan kaapi na an panlawas ngan palibot.
Ini nagbubuhat sin napulo nga miting kada tuig sa Africa, East Asia, Latin America ngan sa Middle East.
An pinaka urhi nga World Economic Forum on East Asia in ginhimo sa Seoul, South Korea kon diin nagtutok san implikasyon san krisis san ekonomiya pankalibutan sa rehiyon. (PIA-Northern Samar) [top]
