By Lanie Pitao-Tupaz

Manila (26 July) -- Si Justice Secretary Leila De Lima miingon nga iyang irekomenda ngadto ni Presidente Benigno C. Aquino III ang total revamp sa komposisyon sa Presidential Commission on Good Government kon PCGG apan dili ang pagwagtang sa maong ahensiya tungod kay nagkinahanglan kita sa bag-ong pamaagi, bag-ong mga nawong nga adunay pagtamod sa oras ug panahon, ug grupo nga mopadali pagresolba sa mga kaso sa ahensya.

Si De Lima miingon nga wala makabuhat sa kinatibuk-ang mandato niini ang PCGG sukad pa kini mamugna ni kanhi Presidente Corazon C. Aquino niadtong Pebrero 1986.

Ang komisyon nakatotok sa criminal prosecution ug pagkuha sa mga gialegar nga ill-gotten wealth ni kanhi Presidente Ferdinand Marcos, sa iyang pamilya, ug mga kaalyado.

Ang pagbalasa sa PCGG usa lamang sa mga reporma diha sa Department of Justice kon DOJ sa tinguha pagwagtang sa corruption ug mapabalik ang pagsalig sa katawhan, sumala pa ni De Lima.

Gitun-an pa usab ni De Lima ang pagbalik sa Task Force Anti-Smuggling ug Task Force Anti-Tax Evasion aron makahatag ug suporta sa kampanya sa Bureau of Customs ug Bureau of Internal Revenue kontra sa smuggling ug pagpanglimbong sa buhisan.

Apan magpabilin ang Task Force Anti-Human Trafficking ubos sa pagpanguna ni Undersecretary Jose Vicente Salazar diin nag-una sa agenda niini ang kaso batok sa 18 ka mga personnel sa Manila International Airport Authority kon MIAA kinsa nahilambigit sa trafficking sa mga Filipinos sa gawas sa nasud.

Rebisahon usab ni De Lima ang gialegar nga mga "midnight rulings" sa nahiuna kaniya kabahin sa kontrobersiya nga poaching case batok sa mga Chinese nationals nga nadakpan sa Palawan ug ang mangilngi nga murder case ni Ruby Rose Barrameda.