Cebuano News: Mga anomaliya nga gibutyag ni PNoy sa SONA di na kinahanglan imbestigahan pa sa Senado
Manila (29 July) -- Dili na manistil magpahigayon pa og imbestigasyon ang Senado kalabot sa mga anomaliya nga gipabuhagay ni Presidente Benigno Aquino III sa iyang State of the Nation Address pagka Lunes, sumala pa ni Senator Juan Ponce Enrile.
Atubangan sa mga tigbalita, si Enrile miingon nga igo na ang Truth Commission nga giumol sa Presidente maoy mo-imbestigar sa giingong mga kahiwian nga hapit mohurot sa pundo sa gobyerno karong 2010.
Giklaro ni Enrile nga angay hatagan una og higayon ang Truth Commission nga molihok sa mandato niini, ug dili sab makatabang nga magdoble-doble ang trabaho.
Miuyon sa maong huna-huna si Senate minority leader Allan Cayetano sa pag-ingon niini nga mas daghang aksyon mahimo kon pasagdan lang una ang Truth Commission sa iyang gimbuhaton.
Matud ni Cayetano nga ang buhaton lang sa Senado mao ang pagmando sa mga GOCC sa pag-sumite sa Palasyo, sa Senado, ug sa Ubos Bay-balauranan sa listahan sa ilang mga opisyal ug mga trustees, lakip na mga listahan sa mga benepisyo, suweldo, ug bonus nga ilang nadawat aron masuta kon talagsaon ba ang kaso sa MWSS o ingon ba gyod kaha niini ang pagdumala sa mga GOCC. (PIA-Southern Leyte) [top]
