By Juju S. Manubag

Cebu City (1 October) -- Biente-uno mil (21,000) sa kapin singkwenta uno mil (51,000+) nga mga kabos nga natala sa National Household Targeting System (NHTS) sa Department of Social Welfare & Development (DSWD-7) and gipaninguha sa Philhealth sa rehiyon 7 nga mahatagan ug Philhealth cards sa National Philhealth Registration Day (NPRD) karong Sabado Oktubre 2, 2010.

Matod pa ni Jenet Ann Advicula, hepe sa Philhealth's Field Operations Division,.ang mga kabos mao kining walay kwarta nga ikapalit sa mga panginahanglan sa inadad-law nga panginabuhi.

Sa laing bahin, si Dr. Susana Madarieta sa DOH-7 nagkanayon nga.adunay dos mil otso siyentos uno (2,801) sa siyudad sa Lapulapu; treinta mil dos siyentos dos (30,200) sa siyudad sa Sugbo; disiotso mil sais siyentos beinte kwatro (18,624) sa siyudad sa Mandaue ug siyento beinte sais mil ug sais siyentos singkwenta y singko (126,655) sa probinsiya sa Sugbo nga nalista nga mga kabos o indigents sa NHTS.

Matud pa sa PhilHealth nga ang mga kabos nga lumulopyo sa Consolacion, Cordova, Lapulapu, Mandaue, Minglanilla ug Talisay diri sa Cebu; Alburquerque, Antequerra, Baclayon, Balilihan, Corella, Cortes, Lila, Loay, Sikatuna, Tagbilaran ug Loon sa Bohol; Amlan, Bacong, Dauin, San Jose, Sibulan, Valencia, Tanjay, Dumaguete City sa Negros Oriental ug sa Enrique Villanueva, Larena, Siquijor, Maria,San Juan ug Lazi sa Siquijor mao na ang natudlo sa DSWD ug natala sa NHTS nga lista nga pagahatagan karong Sabado ug Philhealth cards.

Gikinihanglan nga magdala ug ID sama sa Voters'ID o Senior Citizens' ID inig adto sa Sabado sa mga gikahisgutang lugar nga pagahimoon ang NPRD, dugang pa ni Madarieta.

Si Advincula mipasayod sa publiko nga ang coverage sa Philhealth card nga ipanghatag nila karong Sabado alang sa mga kabos mosugod karong Octubre 1, 2010 hangtod September 30, 2011.

Si Dr Lyden Briones, kanhi presidente sa Cebu Medical Society nga didto usab sa maong forum nga gipahigayon sa DOH, nagpahibalo usab nga ang ilahang grupo motabang sa pag-screen sa mga registrants nga mga kabos nga moadto karong Sabado nga masakiton ug kinahanglan na nga ipasulod sa mga PHIC-accredited nga hospital aron magamit na dayon ang ilang Philhealth cards.

Gi-awhag usab sa mga opisyales sa DOH, Philhealth, DILG ug DepED nga kadtong wala pa makapanag-iya ug Philhealth card ug adunay katakos nga makabayad ug P100 matag bulan nga contribution nga magparehistro na usab karong Sabado.

Gikinahanglan lamang nga magdala ug ID ug tres siyentos pesos (P300) alang sa bayad sa unang quarter sa tuig.