Davao City (9 December) -- Ang Pantawid Pamilyang Pilipino Program (4Ps) nga gipatuman sa Department of Social Welfare and Development (DSWD) wala gatugot sa bisan kinsa nga mangolekta og kwarta gikan sa mga benepisyaryo sa programa.

Ang mga benepisyaryo sa 4Ps kinahanglan lamang nga motuman sa kondisyon sa edukasyon, kahimtang panlawas ug binulan nga pagtambong sa mga Family Development Sessions (FDS) nga gipangayo sa programa.

Ang 4Ps nagtinguha nga mapakunhod ang ekonomikanhong kalisod sa mga pobreng pamilya sa Pilipinas ginamit ang Conditional Cash Transfer Program. Kini gahatag og ayuda nga pinansyal aron mapalambo ang kahimtang panlawas ug edukasyon sa mga batang nagpangidaron og zero (0) hangtod katorse (14) anyos, ug mapalambo ang kahimtang sa relasyon sa magtiayon diha sa pagdumala sa pamilya. Ang DSWD maoy responsable sa pagpili sa angayan mahilakip pinaagi sa survey nga National Household Targeting System for Poverty Reduction (NHTSPR).

Ang DSWD usab ang magpahitabo sa mga enumerasyon ug pagpili sa mga posibleng mamahimong mga benepisaryo sa programa pinaagi sa Proxy-Means Test (PMT). Ang PMT usa ka statistical test nga magsukod sa ekonomikanhong kalisod sa sa ka pobreng pamilya. Ang DSWD usab ang molantaw kon ang mga benepisyaryo sa programa nagatuman sa mga kondisyon nga gipangayo kanila pinaagi sa Compliance Verification System (CVS). Ang Land Bank of the Philippines maoy gitahasan sa paghatag sa subsidiya diretso sa mga benepisyaryo sa 4Ps.