Cebuano News: RDCC nangandam kontra bagyo moigo sa Sugbo sa Disyembre
by Roberto M. Cabardo
Cebu City (19 October) -- Gawas sa ASEAN Summit, giapil sa pagpangandam karon sa Regional Disaster Coordinating Council (RDCC) ang posibleng pag-igo sa Sugbo sa di momenos usa ka bagyo sulod sa bulan sa Nobyembre og Disyembre ning tuiga.
Base sa pamahayag ni PAG-ASA weather specialist Al Quiblat sa briefing kabahin sa preparasyon alang sa ASEAN Summit nga gihimo sa Regional Disaster Coordinating Council (RDCC) nga gipanguluhan ni P/CSupt. Silverio Alarcio Jr. sa PRO 7.
Matud ni Quiblat, sukad pa sa tuig mil nueve cientos nobenta ang Sugbo sagad maigo sa bagyo sa mga bulan sa Nobyembre og Disyembre. Gani niingon siya nga, "Saez cienta y singko (65%) porsiyento sa mga bagyong niigo sa Sugbo nahitabo sa bulan sa Nobyembre og Disyembre."
Ningon sab si Quiblat nga sa pagkakaron ang Kabisay-an nakasinati sa intertropical convergence zone (ITCZ) kon pagtagbo sa bugnaw og init nga hangin sa kawanangan nga moresulta dayon sa dugdug og ulan.
Hinuon, niingon si Quiblat nga ang intertropical convergence zone mohinay sa bulan sa Nobyembre og Disyembre og ang mopatigbabaw nga panahon mao na ang bugnawng huros sa hangin gikan sa silangan nga di kaayo magdala og ulan.
Sa iyang bahin, ang Chairman sa RDCC og regional director usab sa PRO 7, P/CSupt. Silverio Alarcio Jr., nagkanayon usab nga ang RDCC kanunayng nangandam di lang gani sa bagyo kung dili sa tanang klase sa kalamidad, "Short term for the (ASEAN) summit and long term as part of preparedness of Region 7 after the summit."
Karong higayona, usa ang segurado nag-ampo ang tanang mga Sugbuanon nga unta way bagyo nga moigo sa Sugbo atol sa ASEAN Summit. (PIA Cebu) [top]
