Cebuano News: Kasikas sa politika wa maka-tandog sa pag-pangalagad ni PGMA
Manila (15 February) -- Si Presidente Gloria Macapagal Arroyo nagapadayon sa naandan niyang pagdumala sa renda sa pangagamhanan ug wala mabalda sa kabanha sa politika ug gumikan niana ang tibuok niyang gabinete nagpaluyo kaniya.
Kini maoy gisulti ni Health Secretary Francisco Duque III kagahapong adlawa.
Giluwatan ni Duque ang maong pamahayag pipila ka gutlo sa wala pa moabot ang Presidente alang sa Vitamin A supplementation ug gift-giving sa mga batang tinun-an sa San Lorenzo Ruiz Elementary School kagahapon sa hapon didto sa Karangalan Village sa Mangahan, Pasig City.
"Ang kinatibuk-ang gabinete anaa sa likod sa Pangulo sa pag-trabaho sa iyang mga buhatonon nga tipik sa iyang naandan nga programa," si Duque miingon.
Lakip sa mga mi-welcome pag-abot sa Presidente mao sila si Department of Education (DeEd) Secretary Jesli Lapus, Pasig City Mayor Robert Eusebio, Pasig Lone District Rep. Roman Romulo, National Nutrition Council (NNC) Executive Director Bernardita Flores, ug San Lorenzo Ruiz Elementary School Principal Gil Andrade.
Si Duque midugang pag-ingon nga ang schedule sa Presidente sa Pasig City dili pamolitika kondi kabahin sa iyang regular nga trabaho pag-paisa sa sector sa edukasyon diha sa mga health programs alang sa mga kabataan sa elementarya, sama sa supplemental feeding program nga nagsugod sa tuig 2006.
Si Cong. Romulo mipuno sab pag-ingon nga ang Charter Change dili usa ka isyu sa Ubos Bay-Balauranan sanglit daghan usab silag gi-atubang, ug ngani 40 na ka balaodnon ang ilang napalabang sud sa pipila pa lang ka adlaw paglingkod sa bag-ong House Speaker nga si Prospero Nograles.
"Wala maghisgut sa Kongres og Charter Change, naa lang kana sa peryodiko," ni Romulo pa.
Sa iyang pagbisita, ang Presidente maoy nag-una sa pag-apod-apod og mga iron-fortified nga bugas ug mga dental kits sa mga kabataan ubos sa iyang Food for School Program.
Gihatagan ang Pangulo og usa ka Valentine card nga gituyo paghimo sa mga estudyante alang kaniya, samtang gidalitan sab siyag awit gikan sa pundok sa mga visually-impaired pupils. (PIA-Southern Leyte) [top]