Ni Jessie R. Valdez

San Fernando City, La Union (6 November) -- Naiyuswat itay nabiit ti Pondong Pamanang Lingkod Bayan (PPLBS) ken Scholarship program a pinonduan ni Presidente Gloria Macapagal Arroyo manipud iti President's Social Fund na nga agarup maysa a milyon a pisos kas pangrugyan a pondo para pampamilya dagiti trabahador ti gobierno a natay iti oras ti panagserbi da ti gobierno ken tattao.

Daytoy a programa ket mangted tulong a pinansial ken pagiskuela dagiti annak ti namatayan ken wagas a panangbibig kadagiti serbisyo ken sakripisyo dagiti trabahador ti gobierno karaman dagiti mamaestra ken pulis a pimmusay, biktima man ti pammapatay wenno nadisgrasya a gapuanan ti ipupusay na a madama ti oras ti panagtrabaho na.

Daytoy PPLBS nabuangay babaen ti panangidaulo ti Civil Service Commission (CSC) tapno maikkan onor dagidiay nga nagserserbi iti gobierno ken tattao a kas tulung a mangitag-ay ken mangkumfortar ti kasasaad dagiti pamilya a namatayan.

Segun iti Memorandum of Agreement (MOA) a nagpinnirmaan ti CSC ken Philippine Association of State Universities and Colleges (PASUC) isuda ti maka-ammo nga mangted ti scholarship dagiti annak ti pampamilya a maseknan ket adda sangagasut ket sangapulo ket maysa nga State Universities iti entero a pagilyan karaman ti University of the Philippines nga mang-akomodar kadagiti agiskuela nga an-annak da.

Ti proseso nga maaramid iti daytoy a programa ket umuna nga umawat ti pamilya iti agarup duapulo a ribu a pisos ken tallo ti mabenepisyuan ti PPLBS scholarships. Ti umuna a mabenepisyuan, buo ti scholarship a maipaay ket ti sumaruno, pitupulo ket lima a porsiento ti mausar nan nga scholarship ket ti maikatlo, limapulo a porsiento laengen ti maited kaniana a pagadal.