Cebuano News: Papason ang rebelyon sa Negros Oriental sa 3 ka tuig
Cebu City (29 July) -- Papason ang suliran sa insurhensya sulod sa tulo ka tuig.
Kini maoy mandu ni Regional Peace and Order Council (RPOC) Chairman ug Cebu Governor Gwendolyn Garcia ngadto sa mga opisyales sa army nga tua madestino sa Negros Oriental.
Didto sa tigum sa RPOC nga nahitabo sa Bohol Tropics niadtong Hulyo 27, si Garcia mibutyag nga buot niya nga madeklara na ang kinatibuk-ang Sentrong Kabisay-an nga nakalingkawas na sa suliran sa insurhensya sa labing daling panahon.
Kahinumduman nga sa tibuok Sentrong Kabisay-an, ang lalawigan na lamang sa Negros Oriental ang kasamtangang gisamok sa mga rebelde.
Nadeklara na ang Bohol ug Sugbo nga luwas sa hulga samtang wala isipa nga suliran sa lalawigan sa Siquijor ang insurhensya.
Ang gibug-aton sa hagit sa RPOC didto mabundak sa abaga sa 302nd Brigade sa army uban ni Col Manuel Garchitorena, commanding Officer sa army didto.
Ang bahan ni Col. Garchitorena may gahum sa pagpalihok sa paglutos sa mga rebelde inabagan sa iyang brigada ug uban usab sa 79th Infantry Batallion, matud ni Garchitorena.
Sa kabug-at sa misyon, misalig si Garchitorena nga uban sa kasinatian sa Bohol ug Cebu mahimo ra usab nila nga sundugan aron molampus sa ilang misyon. (PIA Bohol) [top]
