Cebu City (29 July) -- MGA saag nga armas moboto nga naa karon sa mga kamot sa mga kriminal maoy nakapabalaka sa mga tinugyanan sa Regional Peace and Order Council (RPOC) didto sa tigum niadtong miaging adlaw.

Kini tungod usab sa kamatuoran nga samtang napaubos ang kriminalidad sa Tunga-tungang Kaisay-an sa buwan sa Hunyo, nitaas usab ang kawat, pagpanulis, ug pagpamun-og sa rehiyon sa samang panahon.

Kasagaran ning mga krimen, gihimo gamit ang armas nga moboto, matud ni PSsupt. Melvin Ramon Buenafe, hepe sa regional intelligence sa Campo Sotero Cabahug sa Sugbo.

Matud ni Buenafe, samtang nia sa rehiyon ang labing daghang backyard nga himoanan sa armas, usa sa upat ka bahin ra ang armas nga naihap sa kapolisan.

Gibanabana nga may 49, 136 ka armas nga nia sa Central Visayas, 11,080 lang niini ang narehistro, segun sa kapolisan.