Cebuano News: 727 'wangwangs' nasakmit sa PNP-7
Cebu City (29 July) -- Adunay 727 nga 'wangwang devices' ang nasakmit ug natahan na sa kapolisan sa rehiyon 7.
Kini maoy nahisgutan sa gipahigayon nga ika-36th Talakayan sa Insyung Pulis (TSIP) Forum sa nagkalain-laing director sa kapolisan sa rehiyon 7 nga gipangulohan ni S/Supt Silvestro A. Primero, Deputy Regional Director for Administration.
Sa 727, ang Regional Highway Patrol Group 7 nakakumpiska kini ug 395 ug misunod niini ang Cebu City Police Office nga adunay 165 ka buok nga nadakpan.
Ang Mandaue City Police Office usab adunay nasakmit nga mga 73 ka mga 'wangwang devices'ug usa ra ka buok ang sa Bohol Provincial Police Office.
Sa laing bahin, ang Cebu Provincial Police Office adunay 66 ka mga'wangwang' nga nasakmit uban usab sa Lapulapulapu City Police Office nga may 27 ka mga dinakpang.
Ang 727 nga nangadakpan naglangkob kini sa mga blinkers, foglights, strobelights, horns ug 'wangwangs'.
Si P/Supt. Patrocinio Comendador Jr, hepe sa Cebu City Police Office nagkanayon nga ang presyo sa 'wangwang' kaniadto nagkantidad kini ug sais siyentos pesos.
"Sa pagkakaron kay dos siyentos pesos na lamang. Kaniadto ang mamaligya ug'wangwang kay may lima ka sangang buhatan. Karon usa na lamang ang nagpabilin namaligya ug 'wangwang'," si Comendador midugang sa pagingon.
Matod pa usab ni S/Supt Ernesto Agas, hepe sa Police Regional Office ang kapolisan magpadayon sa pagpanikop sa mga sakyanan nga adunay wangwang segun sa mando ni Presidente Simeon Benigno Aquino sulod sa iyang niaging SONA nga dakpon ang tanang mga sakyanan nga adunay mga'wangwang' aron lang makalusot sa trapiko.
"Patawan na ug unom ka bulan nga pagkabilanggo, sais siyentos nga multa ug pagsakmit sa certificate of registration sa sakyanan ug madakpan kini sa makaduhang higayon," si Agas miingon. (PIA7/juju) [top]
