Manila (19 October) -- Ang gina proponer nga bill ni Senador Miriam Santiago nga silutan ang mga tawo ukon organisasyon nga maga -estar sa mga ginaagyan sang tubig dapat hatagan sang nagakaangay nga atensyon.

Suno sa Malacanang, ini bangud sa mga kahalitan nga dala sang mga bagyo nga Ondoy kag Pepeng nga nagkuha sang madamo nga kabuhi kag nagguba sang mga propyedad.

Nag file si Santiago sang Senate Bill No. 3483 nga magasilot sa mga maga estar sa alagyan sang tubig nga nagapugong sa pag agi sang tubig nga magadala naman sang pirmi-pirmi kag mabaskog nga pagbaha.

Sa isa ka interview, si Presidential Spokesperson for Economic Affairs Professor Gary Olivar nagsiling nga ang ginaproponer nga bill dapat i-konsiderar kag i-implementar.

Suno kay Olivar, pabor ang Palasyo sa ano man nga solusyon nga magapahagan-hagan sang kahuyang sang mga probinsya sa natural nga mga disgrasya dala na ang mga panugda sa pag improbar sang kapabilidad sang nasyon sa pag-aksyon kon may kalamidad.

Sa iya proposal, si Santiago nagsambit sa wala konsiderasyon nga pagpatindog sang mga building kag subdivision sa alagyan sang tubig, amo man ang pigado nga pagplano nga nagpalain sang sitwasyon sang Metro Manila nga nag resulta sa pag-abang sa pag agi sang tubig nga nag resulta sa grabe nga pagbaha.