Waray-Waray News: Tres milyones nga Filipino matindog ngan maglalata kontra kapobrehan
By Ailene N. Diaz
Catarman, Northern Samar (15 October) -- An Pilipinas in andam dida san Guinness world record para san tidadamoi nga mga tawo nga matindog kontra kapobrehan san ika duha na ka tuig.
An United Nations, kaupod san mga partner sini in gin-aandam para pakiwahon an tulo ka milyon nga mga Filipino nga tumindog kontra kapobrehan san yana nga tuig nga kampanya, ini in pankalibutan nga UN anti-poverty campaign nga gin-uundong nga makab-ot an Millennium Development Goals (MDGs).
An tema san kampanya sa Pilipinas mao in "Kumilos, Minindigan! Labanan ang Kahirapan!"
Sa pakigtrabaho dida san National Anti-Poverty Commission (NAPC), All Together in Dignity Fourth World (ATD) ngan an Global Call to Action Against Poverty (GCAP), tulo nga iba iba nga buruhaton an paghihimuon san bug-os nga Metro Manila sa Mierkules, Oktobre 17 nga mao an pankalibutanon nga adlaw para san Eradication of Poverty nga pagbubuhaton san Open Air Auditorium Rizal Park tikang alas syete san aga abot alas doce sa umodto; Anti-Poverty Fair sa Quezon City Elliptical Circle tikang alas nueve sa aga abot alas singko san kulop ngan Millennium Development Goals Youth Concert sa alas sais san kulop abot alas otso sa gab-i sa Market, market.
An kampanya Stand up Against Poverty san naglabay nga tuig in nakakauha sin titulo sa Guinness Book of World Record sa pagkab-ot sini sin 24 milyones nga mga tawo nga nagtindog kontra kapobrehan sa 24 ka oras tikang san 87 nga mga nasud.
An Pilipinas nakakuha san ika tulo nga pwesto sa Asia Pacific Region nga yaun 2.4 milyones nga mga tawo nga nag-api san kampanya, gin-unahan san India nga yaun siyam ka milyon ngan gin sundan san Nepal nga yaun sobra tres milyones.
Adton mga Filipino nga diri makaapi san buruhaton san Metro Manila, in puede mag organisar san ira 'Stand Up' nga buruhaton sa mga eskwelahan ngan san tagsa tagsa nga kumunidad.
Para san ngatanan nga partesepantes in kinahanglan ig enroll an ira Stand Up event antes mag Oktobre 17 sa millenniumcampaign.ph@undp.org
Sa Oktobre 17, tikang san alas singko san aga abot alas doce san gab-i, an ungod nga numero ngan ngaran san mga partisepantes in kinahanglan maipadara san nasabi nga email address para maiapi san lista ngan ma ihap san kabug-usan nga lista pankalibutan.
Pinaagi san Stand Up Campaign, an United Nations in padayon nga nagpapahinumdum san gobyerno ngan mga lederes san ira ginsaaran nga makab-ot an MDGs labi na dida san pagpaubos san kapobrehan.
An Pilipinas in sayo san 191 nga estado nga nagpirma sa Millennium Declaration, diin nasasakop an gin komiter pag kab-ot san MDG, ini in sayo nga time-bound, nasusukol nga targets ma pirdi an kapobre, kagutom, sakit, paglagas san palibot, ngan diskriminasyon sa maabot nga 2015.
An mga ginhihingyap mao an: pagwara san subra nga kapobrehan ngan kagutom, pag kab-ot san universal primary nga edukasyon, pag undong san gender quality pag pakusog san kababayen-an, pag-iban san nagkakamatay nga kabataan, pag pakaupay san panlawas san mga nanay, pag ato kuntra HIV/AIDS, malaria ngan iba pa nga sakit, pagpaseguro nga masustener an palibot o environment ngan pag sudlong san global partnership para san pag uswag. (PIA, Northern Samar) [top]
