Cebuano News: Hepe sa OCD mihangyo sa tagtungod sa mga namatayng pasahero's barko
by Roberto M. Cabardo
Cebu City (1 July) -- Gibutyag ni Office of Civil Defense Director Minda Morante nga padayon silang nanawagan sa mga tagtungod sa mga pasahero sa nalunod nga M/V Princess of the Stars nga magdala gyud og mga dokumento sama sa ID, Voter's Certificate of Registration, mga hulagway, dental records og uban pa aron madali pag-ila ang ilang mga tagtungod.
Matud ni Morante, nanghinaut siya nga ang mga tagtungod sa mga pasahero nga gidudahang apil sa nalunod nga barko nga gusto sab sa Office of Civil Defense og sa regional disaster coordinating council nga madali ang pag-ila sa ilang mga minahal sa kinabuhi.
Apan kinahanglang masabtan sab sa mga tagtungod nga adunay proseso nga angayng sundon aron ciento por ciento gyud nga mailhan ang ilang mga minahal sa kinabuhi.
Gikatakda nga dunay dugang nobenta y nueve ka mga patayng lawas sa pasahero sa nalunod nga barko ang moabot sa Sugbo karong buntag. (PIA Cebu) [top]
