Roxas City (22 March) -- Nagapadayon sa karon ang assessment sang Police Regional Office ukon PRO ? 6 sa mga interesado nga aplikante sa Police Officer 1 ukon PO1.

Ginpahayag sa blogsite sang PRO-6 Public Information Office nga kapin sa 750 ka mga bag-o nga pulis ang natalana nga pagapilion agud nga magabulos sa mga maga-retiro, nag-resign, na-dismiss ukon napatay nga pulis sa rehiyon.

Ginpahayag ni Heneral Isagani Cuevas nga amo ang Regional Director sang PRO -6 nga ang pag-recruit sang mga PO1 ang magadugang sa puwersa sang mga kapulisan sa mga nagkalainlain nga estasyon sang kapulisan agud nga lubos pa gid nga mapangapinan ang kalinong kag katawhayan.

Ang mga aplikante ang nagakadapat nga mag-sumite sang ila mga dokumento sa Regional Personnel, Human Resource, and Doctrine Development Division ukon RPHRDDD para sa evaluation sang mga papeles.

Nahibaluan nga base sa Republic Act 6975, ang mga aplikante para sa PO1 ang nagakadapat nga residente sang pungsod, may maayo nga pamatasan, nakapasar sa mga egsaminasyon kapareho sang psychiatric ukon psychological, drug test kag physical test.

Dugang pa sa mga kwalipikasyon amo ang baccalaureate degree, wala maka-agi dismiss sa gin-obrahan subongman wala mapamatbatan sa hukmanan sa ano man nga krimen magluwas pa sa mga kinahanglanon sa kataason kag panglawason base sa kasari-an kag edad.

Samtang ang mga aplikante ang nagakadapat 21 anyos apang indi man maglapaw sa 30 anyos ang pang-edaron.

Subongman ang mga mabaton ang dapat may eligibility pinaagi sa pagkapasa sa mga examination kapareho sang Bar and Board Exam, PNP Entrance Exam, Licensure Examination para sa mga grawado sang Criminology kag sa Civil Service Commission Second Level Eligibility.