Cebuano News: PGMA, ginapadali ang mga panabang alang sa mga biktima sa baha sa Samar
Ni Jordan Britos
Manila (21 February) -- Gimando na ni Pangulong Gloria Macapagal-Arroyo ang pagpadali sa mga panabang ug rehabilitasyon lakip na ang pag-release ug calamity fund alang ngadto sa mga nahimong biktima sa baha sa Eastern Samar kung asa 11 ka mga tawo ang kompirmadong nakabsan sa kinabuhi, samtang 9,000 ka mga pamilya ang nawad-an sa ilang pinuy-anan.
Nasayran nga ang nasangpit nga baha ang miresulta sa mukabat 50 milyones pesos nga damyos gumikan sa pagkadaot sa mga produktong pang-grikultura ug uban pang propedad.
Sumala ni Press Secretary and Presidential Spokesperson Ignacio Bunye nga buot sa Pangulo nga ma-release ug magamit ang bag-ong gigahin nga pondo, lakip na usab ang "resourses" nga una nang gi-deploy sa Department of Social Welfare and Development (DSWD), Department of Public Works and Highways (DPWH), ug uban pang departamento sa gobyerno.
Dugang matud pa nga gimando sa Pangulo ang pagpaayo sa mga nadamyos nga infrastraktura, inagian sa perwisyong baha kung kini ang itugot sa maayong dagan sa panahon.
Ang nasangpit nga baha ug paglandslide sa nasangpit nga lugar ang epekto sa siyam ka adlaw nga sunud-sunod nga pag-ulan nga nakahimo usab sa pagkabuskag halos sa tibuok Eastern Samar. (PIA-SarGen) [top]
