Waray-Waray News: PGMA nagpabati hin kakontento bahin han RDCC-3 disaster preparedness and response plan
Clark Freeport Zone, Pampanga (1 July) -- An Regional Disaster Preparedness & Response Plan (RDPRP) han Regional Disaster Coordinating Council (RDCC) han Rehiyon 3, in nakakuha hin pag-aprobar tikang kan Presidente Glorial Macapagal-Arroyo matapos ini igprisentar han disaster coordinating body ngadto han Presidente dida han iya iginpatawag nga RDCC nga katitirok ha "Bahay na Puti" o "White House", kun diin amo an iya residensya kun hiya in nabisita hini nga lugar.
Nagsiring hi Spokesperson Lorelei Fajardo nga an President in nagpakita hin kakuntento parti han RDCC 3's RDPRP mahuman ipakita usa-usa an mga dokumento ngan mag-splikar ni Director Neri Amparo han Office of Civil Defense parti han mga detalye.
He report nga ginhatag han RDCC, tanan tikang ha pagpriparar kun may kalamidad, ngadto ha pag-implimentar han mga burohaton parti pagbulig, in aada ha oras ngan nakalista nga ira mga trabahuon in nakukuha ha ira igintakda nga oras. Salit, tungod hini, nakuntento an Presidente, dugang pa ni Fajardo.
Ha ilarum hini nga RDPRP, an mga patakaran ngan mga responsibilidad han kada ahensya han gobyerno nga natutungdan nga kinahanglan buhaton antis ngan kahuman in usa nga kalamidad in klaro nga nakaplastar, salit harayo o guti-ay it posibilidad nga magka-ada hin sayop.
Hini nga katitirok, gintudlok han Presidente nga kinahanglan han RDPRP ig-upod in "debriefing" nga programa para han mga apektado nga mga pamilya ngan indibidwal para an trauma han kalamidad nga ira gin-again in mas magaan dad-on ngan mas madali mapara para hera in makagpadayon han ira tagsa nga kinabuhi. (PIA-8/maa) [top]
