Hiligaynon News: Gobyerno prayoridad ang research and development para mag-umwad ang ekonomiya
Manila (10 July) -- Si Presidente Gloria Macapagal-Arroyo nagsiling nga sa pagpalapnag sang engineering research and development (R&D) ang gobyerno nag-andam sang balor tres bilyones pesos nga special nga pondo sa pagpanalawsaw kag pag-umwad sang teknolohiya sa sulod sang 2007 hasta 2010, upod ang Science and Technology Complex sa University of the Philippines. Para padayon nga mapalapnag ang mga aktibidades sa engineering R&D sa bug-os nga nasyon para mabag-o ang tanan nga aspeto sini.
Kinahanglan ang modernisasyon nga nakabase sa Medium Term Plan, nga madamo sang R&D nga kinahanglan ang katawhan para maabot sang aton nasyon ang First World sa sulod sang bente ka tuig. Sang nagligad nga tuig ang science and technology consortium nga ginapamunuan sang UP, nagatanyag sang eskolarship sa idalum sang R&D development program para sa masters kag doctoral degrees sa science kag engineering.
Hambal ni presidente nga sa 2008 general appropriation ang DOST nakabaton sang daku nga pagtaas sang budget nga may 51% ang pagtaas para buligan ang programa nga R&D sa pagkaon, agrikultura, enerhiya, maayong panglawas, information kag communication technology, kag ang pag-amlig sang palibot , upod na ang disaster prevention.
Dugang pa ni presidente nga ang una nga tatlo ka prayoridad amo ang ekonomiya, edukasyon, kag environment. Dugang pa ang pagsolbar sang problema kada adlaw ilabi na sa enerhiya kag pagkaon sa kada lamesa sang mga imol nga Pilipino. (EBC/PIA 12) [top]
