Hiligaynon News: LGU-Esperanza, Sultan Kudarat nagapanghatag sang fertilizer discount coupon
Koronadal City (10 July) -- Ang Munisipyo sang Esperanza sa probinsiya sang Sultan Kudarat nag-umpisa na sa pagpanghatag sang fertilizer discout coupon para buligan ang mga mangunguma nga naapektuhan sang nag-agi nga mga kalamidad.
Suno kay Renato Labanero, Esperanza Municipal Agricultural Officer, ang nasambit nga fertilizer subsidy nga nagabalor sang dos siyentos singkuwenta (P250) pesos kada sako sang abono kada mangunguma gina-umpisahan na sa panghatag sa mga mangunguma sa mga nasakupan sini nga mga barangay.
Si Esperanza Municipal Mayor Romulo Latog Jr. nagsiling man nga ang nasambit nga fertilizer subsidy halin sa gobyerno nga lokal.nga nagakantidad sang dos siyentos singkwenta (P250) daku ang mabulig sa mga mangunguma tungod sa mataas nga presyo sang abono nga nakaabot na sa dos mil pesos kada sako. Ang kinyentos pesos nga halin sa national government pinaagi sa DA ginalauman man sang mga mangunguma nga madawat man sa labing madali nga panahon, suno sa nauna na nga ginpabutyag nani Presidente Gloria Macapagal Arroyo.
Mahibaluan nga si Presidente Arroyo nagmandu sa Department of Agriculture nga buligan ang mga mangunguma pinaagi sa paggamit sang maayo nga binhi kag monetization para sa abono nga pagakuhaon sa internal revenue allotment halin sang 2002 hasta 2004 nga arrears sang local government units para magamit sa pagpanghatag sang nasambit nga subsidy sa mangunguma.(EB dela Cruz/aca/PIA 12) [top]
