Cebuano News: Pres. Arroyo mobisita sa North Cotabato karong adlawa aron sa pagtan-aw sa kinahanglanon sa industriya sa guma sa maong dapit
Manila (July 21) -- Mobisita karong adlawa (Lunes) si Presidente Gloria Macapagal Arroyo sa lungsod sa Makilala sa North Cotabato aron sa pagtan-aw sa iyang kaugalingon kon unsaoan ang nasodnong kagamhanan makatabang sa pagpalambo sa panginabuhian sa mga lumulupyo sa probinsya sa guma, ug sa pagpadali sa modernisasyon sa industriya sa guma.
Si North Cotabato Gov. Jesus Sacdalan miingon, ang Makilala lang adunay 7000-8000 ka mga hektaryang plantasyon sa guma. Ang tibuok probinsya adunay 23,432 ka hektaryang yuta ang gitamnan sa guma.
Matod pa ni Sacdalan ang probinsya nagkinahanglan sa diha-diha ug tabang gikan sa nasodnong kagamhanan aron sa pagpalambo pa gayod ug himoong moderno ang mga pasilidades ug teknolohiya sa maong industriya.
"Adunay kuwarta sa guma," miingon si Sacdalan, sa diha iyang gipunting nga ang matag plantasyon sa guma sa iyang probinsya makakita duol sa usa ka milion matag bulan.
Dugtong pa ni Sacdalan, ang pag-upgrade sa teknolohiya ug ubang mga pasilidades sa industriya sa guma moresulta sa mas maayong panginabuhian alang sa mga residente sa North Cotabato lakip makamugna kini ug dugang kita alang sa nasodnong kagamhanan. (PIA9-Pagadian) [top]
