Cagayan de Oro City (29 July) -- Makadawat sa tag P2,250 ang mga Barangay Nutrition Scholars sa mga kalungsuran kada usa ugmang adlawa atol sa ika 36 nga Nutrition Month culmination program nga ipahigayon sa Capitol grounds.

Kabahin kini sa balor P9,000 nga honorarium nga ilang madawat sa Kapitolyo sulod sa usa ka tuig. Samtang ang mga BNS sa Gingoog City makadawat gihapon sa tag-P1,000 kada usa.

Apan giklaro sa Provincial Nutrition Office nga kato lamang naka-submit sa ilang BNS contract nga pirmado sa barangay kapitan, mayor ug gobernador ang mahimong makadawat sa honorarium ugmang adlawa.

Sa tibuok lalawigan, adunay kapin 500 ka mga BNS nga rehistrado sa Provincial Nutrition Office.

Sa laing bahin, makadawat sab sa pasidungog ang mga outstanding program implementers sama sa Most Outstanding Municipality ? Opol, Misamis Oriental; Most Outstanding BNS ? Elenida Reyes, Brgy. Poblacion, Lugait; Most Outstanding Barangay ? Brgy, Poblacion, Lugait.

Ipahigayon sa buntag ugmang adlawa ang programa diin napiling Guest Speaker si Susan Olano Dongallo, MD, MPH, ang chief sa Local Health Support Division sa Center for Health Development-10.

Masaksihan usab sa hapon ang nagkadaiyang food fair ug exhibits sa Capitol grounds.