Manila (29 July) -- Pormal ng gilusad sa mga provincial hospitals sa Balingasag, Talisayan, Manticao ug Gingoog ang modernong telehealth surgery services diin mahimo ng mo-kunsulta ang mga doctor sa pasyente pinaagi sa 3G cellphones ug internet.

Dako ang pasalamat ni Gov. Oscar Moreno sa Smart Communications nga mihatag sa technical assistance ug mga ekipo isip kabahin sa ilang corporate responsibility program nga gitawag nga Kabalikat sa Kalusugan.

Personal nga mibisita sa probinsya niadtong milabayng adlaw si Mon Isberto, ang head sa public affairs sa Smart Communications aron saksihan ang demonstration sa telehealth surgery services uban ang mga sakop sa prensa.

Pinaagi sa maong technolohiya mahimo ng mo-kunsulta ang doctor o muhatag sa iyang diagnosis pinaagi sa internet bisan dili niya makita sa personal ang pasyente.

Mahimong ipahigayon ang screening process(pre-operation) sama sa physical exam, checking of vital signs history, paghatag sa patients information & diagnostic exam, post operative care pina-agi lamang sa online teleconference sa mga hospitals.

Kaabag gihapon sa maong proyekto ang Mindanao Consortium of Surgeons pinanguluhan ni Dr. Maximo Simbulan nga gilangkuban sa mga nag-unang mga surgeons sa rehiyon 10 diin ang uban kanila adunay mga clinics sa Capitol University Medical Center, XU-Maria Reyna Hospital ug German Doctors.

Dako ang benepisyo niini sa mga pasyente kinsa maglisud na pag-adto sa Cagayan de Oro ug mahimo ng makaangkon sa surgical services ang bisan indigent nga pasyente.