PIA Press Release
Wednesday, January 25, 2012Tagalog News: Phoenix, kampeyon sa NECBL 1st seasonCABANATUAN CITY, Nueva Ecija, Enero 25 (PIA) -- Matagumpay na naiuwi ng Nueva Ecija University of Science and Technology (NEUST) Phoenix ang kampeyonato para sa kauna-unahang Nueva Ecija Collegiate Basketball League (NECBL).Sila ay nagkamit ng tropeo at cash award na nagkakahalaga ng P50,000. Tinalo ng Phoenix ang Green Cobras ng Central Luzon State University (CLSU) sa iskor na 66-59. Pinangunahan ni Alvin Cabigting, star player ng Phoenix, ang huling pagtatapat nila ng Green Cobra sa huling round. Si Cabigting ang tinanghal na Most Valuable Player (MVP) ng liga na binigyan ng tropeyo at P10,000 bilang gantimpala. Kabilang din si Cabigting sa Mythical Five ng NECBL kasama sina Emil Renze Palma at Manny Julian, Jr. mula sa Phoenix at Edrian Gallardo at Alex Lee mula naman sa Green Cobra. Bawat isa sa kanila ay nagkamit ng medalya at P3,000. Nakatanggap naman ng tropeyo at P30,000 ang Central Luzon State University (CLSU) Green Cobra na tinanghal na 1st runner-up ng liga. Samantala, nasa plano na ng pamahalaang panlalawigan ang pagdagdag ng iba pang laro upang maging malawak ang sakop ng NECBL na nakatakdang muling buksan sa dadating na Agosto. Ang NECBL ay isang youth at sports development project ng pamahalaang panlalawigan sa pangunguna ni Governor Oyie Umali kasama sina Vice Governor GP Padiernos, Congresswoman Cherry Umali at Board Member Anthony Umali. (WLB/CN/PIA-3) | 
