PIA Press Release
Thursday, January 05, 2012Hiligaynon News: Pre-enrollment para sa Grade 1 bukas naSYUDAD SANG ILOILO, Enero 5 (PIA6) -- Ang 18 ka school divisions sang Department of Education 6 ang handa na sa karon para sa temprano nga pagpalista sang mga manugsulod nga Grade 1 nga mga eskwela sa rehiyon para sa school year 2012-2013.Ginpanugyan ni Dr. Eden Deriada, Hepe sang DepEd 6 Resource Mobilization Special Program and Project Division ang mga ginikanan kag manug-atipan nga iparehistro na sang temprano ang ila mga kwalipikado nga kabataan para sa Grade 1 sa mga buluthuan kon diin nila ginatuyo paeskwelahon ang mga ini. Suno kay Deriada ang himuon gid lamang sang mga ginikanan amo ang pagkadto sa mga buluthuan sa diin ila ginaplano paeskwelahon ang ila kabataan kag pangitaon ang tawo gintugyanan para sa pre-registration. Ang mga kwalipikado sa temprano nga pagpalista sa Grade 1 amo ang mga kabataan nga nabun-ag sang Oktubre 31, 2006 ukon mas maaga pa. “Pinaagi sining pre-enrollment activity, ang mga ginikanan makabulig sa Departamento sa paghatag sang impormasyon agud hibaluon ang mga possible nga interbensyon nga ipatigayon sini agud mapat-ud ang matawhay nga pagbukas sang klase kag ang mga kabataan nga yara sa sa edad sang pag-eskwela ang yara sa buluthuan,” pahayag ni Deriada. Suno pa kay Deriada ang Technical Assistance Monitoring Team sang DepEd 6 magamonitor sang pagpatigayon sang pre-enrolment activity agud tan-awon nga ini ang gina-implementar sang mga school division sa rehiyon. (JSC/LAF-PIA6 Iloilo) | 
