PIA Press Release
Monday, January 09, 2012Kinaray-a News: Antique handa na sa pag-implementar kang KALAHI-CIDSSni Pilar S. Mabaquiao SAN JOSE, Antique, Enero 9 (PIA6) -- Ang probinsya kang Antique handa na sa pag-implementar kang KALAHI-CIDSS ukon Kapit Bisig Laban sa Kahirapan – Comprehensive and Integrated Delivery of Social Services, sangka programa kang Department of Social Welfare and Development. Suno kay Provincial Social Welfare and Development Officer Lazaro Petinglay, ang pagdumarahan probinsyal kag ang walo ka mga banwa handa run sa anda "counterpart" sa amo nga programa lakip na ang halin sa opisina kang Kongressman kang probinsya. “Ang mga project officers kang KALAHI-CIDSS nakapakig-angot run sa mga lokal nga opisyales kag nagapreparar sa pagbukas kang mga opisina sa kabanwahanan,” hambal ni Petinglay. Ang mga kinahanglanun nga manug-obra nagalakip kang engineer, social worker, project officer, bookkeeper kag accountant. Ang una nga anum ka bulan, suno kay Petinglay, masentro sa paghanas kang mga katawhan nga nalakip sa proyekto. Kun nadumduman kang nagligad nga tuig, ang DSWD nagtinguha nga ma aprobahan ang KALAHI-CIDSS sa mga banwa kang Anini-y, Culasi, Caluya, San Remigio, Valderrama, Laua-an, Pandan kag Bugasong sa kantidad nga P113,850,000. Dya nagatuyo sa pagbulig sa iba pa nga programa kang gobyerno agud mapahagan-hagan ang kaimulon kag mabuligan ang mga kumonidad nga mangin mainuswagun. (JSC/MLG/PSM-PIA6 Antique) | 
