PIA Press Release
Wednesday, January 11, 2012Hiligaynon news: SSS may amnestiya para sa mga myembro kag mga amoMANILA, Enero 11, (PIA6) -- Ang Social Security System (SSS) may gintanyag nga bug-os ukon bahin nga amnestiya para sa iya mga myembro kag mga amo nga wala makabayad sang ila mga utang and mga wala mabayad nga mga kontribusyon.Sa isa ka pahayag, ang Presidente sang SSS nga si Emilio de Quiros Jr nagsiling nga isa a bag-o nga programa sa amnestiya ang igahatag sang SSS nga magapahanugot sang mga myembro sa pagbayad sang ila mga utang nga wala sang interes. Kung madumduman ang SSS nagatanyag sa iya mga myembro sang pautang sa suweldo, kalamidad, emerhensya, study-now-pay later, pahunan sa stocks kag mga privatization fund loans. Ang mga myembro may ara tubtub sa Septyembre 30 apang ang mga benepisaryo sang mga naghulam nga napatay kag wala makabayad sang ila mga utang may ara tubtub Marso 30, 2013 sa pagbayad. Suno sa pahayag ni De Quiros, ang SSS maga bale wala sang 100 porsyento sang mga penalidad sang mga kalipikado nga mga aplikante, kung sa diin ang ila wala mabayari nga pautang indi bangud sa ila kasalanan, pareho abi kung ang ila amo wala maka-remit sang ila balayran sa SSS wala sapayan nga sila ginbuhinan sang ila pautang sa ila suweldo. Agud makakuha sa bug-os nga condonation sang mga penalidad, ang myembro sang SSS dapat may tatlo ka bulan nga kontribusyon sa sulod sang anum ka bulan bag-o ang pag-apply sang amnestiya kag magpresentar sang prueba nga siya ginbuhinan sang iya loan amortization. Ini nga mga myembro sarang makabayad sang ila utang kag interes nga bug-os ukon sarang sila makabayad sini sang installment sa sulod sang tatlo ka tuig sa interest nga tatlo ka porsyento. (JCM/PIA6) | 
