PIA Press Release
Friday, January 13, 2012

Hiligaynon News: Paggamit sang moderno nga pagpanguma, makinaryas ginaduso sang DA

SYUDAD SANG ILOILO, Enero 13 (PIA6) -- Ginpabutyag sang Department of Agriculture, Region 6 (DA 6) nga pagatu-unan sang ila igtalupangod karon nga tuig ang kampanya sa pag kunbinyo sa mga mangunguma sa Kabisay-an Nakatundan sa paggamit sang demakina kag moderno nga mga kasangkapan sa pagpanguma.

Suno kay DA 6 Regional Executive Director Larry S. Nacionales, ang ini nga lihok kabahin sang programa ni President Benigno S. Aquino III sa idalum sang farm mechanization kag post-harvest program para sa pagpasanyog sang produksyon sang palay.

“Kon tul-id na ang ihibalo sang aton mga mangunguma bahin sa mga bentaha nga mahatag sang mga moderno nga kasangkapan sa panguma, kag kon paano makaangkon sang sini nga mga kagamitan, makabulig gid sa pagpadaku sang dugang nga produksyon,” hambal ni Director Nacionales sa interview sang PIA.

Suno kay Nacionales ang rehiyon nakatigayon sang maayo nga produksyon sang palay sang tuig 2011 nga nagsobra sa duha ka milyon ka metrika tonilada nga nagbulig tulud sa rehiyon bilang ikaduha nga “rice producing region” sa bug-os nga pungsod.”

Nagalaum si Nacionales nga mahimo nga magaayo pa gid ang produksyon sang rehiyon kon lapnagon na ang paggamit sang mga moderno nga mga kasangkapan pang-agrikultura.

Iya ginpahayag nga manubo pa sa gihapon ang lebel sang agricultural mechanization sa rehiyon. Wala niya mahatag kon daw ano kadamo sang mga mangunguma nga nagagmit sa gihapon sa tradisyonal nga sahi sang pagpanguma.

“Masyado ka trabahoso ang pagpanguma halin sa pagpreparar sang talamnan, pagtanum, pagpanghilamon, pag-ani, pagtipon kag paghakot sang ginalaban nga palay tubtub sa pagpalinas sini kag pagbutang sa sako“, hambal ni Nacionales.

Suno kay Nacionales nga sa idalum sang farm mechanization program, ginapakilala sa mga mangunguma ang mga kasangkapan katulad sang four-wheel tractors, drum seeders, rice combine threshers, dryers, reapers, hand tractors, kag madamo pa.

Gin-ihemplo ni Nacionales ang Rice Combine Harvester, isa ka makinarya nga nagakombinar sang pag-ani, paglinas (threshing), pagtinlo sang palay, kag diretso na sa iya suludlan ukon sako sa isa lang ka paghikot. Makabulig gid sa mga mangunguma ang madasig nga paghikot sang mga dapat himuon sa panahon sang tag-alani, ilabi pa kon wala ka sang kabulig ukon katuwang.

Bilang kabahin sang mechanization program, ang DA magabulig sa mga interesado nga mangunguma kon paano makaangkon sang sini nga mga kagamitan, nga kon sa diin ang gobyerno ang magapangabaga sang 85 porsyenot sang bili sang kagamitan samtang ang nabilin nga 15 porsyento pagabayaran sang mangunguma ukon sang farmers’ association.

“Panahon na para mag-adopta sang moderno nga sahi sang panguma ang aton mga mangunguma diri sa Western Visayas agod madab-ot naton ang kahamungayaan ukon bastante nga suplay sang pagkaon,” hambal Nacionales.(JSC/TWV-PIA6 Iloilo)