PIA Press Release
Sunday, January 15, 2012

Hiligaynon news: Bacolod-Silay airport bukas na sa international flight

SYUDAD SANG SILAY, Negros Occidental, Enero 15 (PIA6) - - Mga Koreano nga taga Inchon sa Nabagatnan nga Korea nagsakay sa direct Zest Air chartered flight kag naghugpa sa Bacolod-Silay Airport sining karon lamang.

Ini nga nahauna nga byahe internasyonal nagdala sang kapin sa 120 ka mga Koreano kag ini pagasundan sang 14 pa ka mga byahe (flights) kada Miyerkules kag Sabado.

Ang mga delegasyon nagalakip sang mga Koreano nga mga tour operators nga gina pangunahan ni Hong Ki Chung, president kag chief executive officer sang Mode Tours, isa sa mga pinakadaku nga tour operators sa South Korea, nga naga espesyalisar sa golf tours.

Ang mga taga Bacolod tour operators naghatag sang panyapon sa kadungganan sang mga Koreano nga mga bisita kag gin imbitar ni Bacolod City Mayor Evelio Leonardia.

Pagkatapus sang panyanpon, Si Mayor Leonardia nag turn over sang Symbolic Key sang Bacolod sa kay Hong Ki Chung, bilang isa ka paagi sa mainit nga pagbaton sang mga Koreano sa City of Smiles.

Suno kay Mayor Leonardia ang ini nga kauswagan nagapanagna sang kaayohan sang turismo sa Bacolod. Nalipay gid ang Mayor nga ang mga Koreano nagkabig sa Bacolod nga malinong kag sila nakabatyag nga malayo sila sa katalagman diri kag ang mga hotel kag mga restaurant may mataas nga kalidad.

Si Leonardia nagmandu sa lokal nga Department of Tourism sa paghatag sang all-out nga suporta kay Mr. Hong kag sa iya mga kaupod sa ila daku nga bulig sa pagdala sang mga Koreano nga mga turista nga mga maluyagon sa paghampang sang golf diri sa syudad sang Bacolod kag sa Negros Occidental.*(JSC/CAD-PIA6 Neg.Occ.)