PIA Press Release
Wednesday, January 25, 2012Hiligaynon News: MRWD nagpaiway sa pag-implementar sang saka sa balayaran sa tubiBy Jemin B. GuillermoSYUDAD SANG ROXAS, Capiz, Enero 25 (PIA6) -- Bisan pa nga aprubado na sang Local Water Utilities Administration (LWUA) ang ginpangayo nga 10 porsyento nga pagpataas sa balayaran sa tubi nga igapatuman sini nga bulan, ginpakamaayo sang Metro Roxas Water District nga iga-implementar ini sa bulan sang Pebrero. Suno kay MRWD Information Officer Dante Arcangeles nga ang 10 porsyento nga pagtaas sa tubi ang igapagkit sa ginkonsumo nga tubi sa Pebrero kag makita pa ini sa billing sa bulan sang Marso pa. Suno sa iya nga gin-aprubahan sang Board of Trustees sang LWUA ang amo nga hingyo sang MRWD pinaagi sa Board Resolution No. 04. Ginpaathag naman ni MRWD General Manager Engr. Gonzalo Glen Delgado nga ang ini nga pagpataas sa balayaran sa tubi ang santo man sa kinahanglanon sang amo nga talatapan sa tunga man sang padayon nga pagtaas sang ila mga balayaran kasubong sang elektrisidad, mga kinahanglanon nga kemikal, gatong, repair kag iban pa nga mga kinahanglanon agod mapasiguro ang tayuyon kag maayo nga serbisyo sang MRWD. Suno pa kay Delgado nga tuman kanubo sang ginpangayo nila nga pagpasaka sa balayaran sa tubi bangod nga kon sadto nagabayad ang konsumidor sang P208.10 sa 10 ka metro kubiko nga nagamit nga tubi, sa bag-o nga balayaran magalab-ot lamang ini sa P229. Ginpasalig man niya nga ang tubi nagikan sa MWRD ang matinlo kag pasado ini sa Philippine National Standards for Drinking Water. (JSC/JBG-PIA6 Capiz) | 
